Տեղեկատվության արտահոսքի պատճառով հայտնի են դարձել Microsoft-ի նոր օպերացիոն համակարգի՝ Windows Phone 8-ի մասին տվյալներ: pocketnow.com կայքը սխալմամբ ստացել է Microsoft-ի փոխնախագահի նամակը, որն իրականում հասցեագրված էր Nokia-ի աշխատակիցներին:
Ու թեև տեսանյութը չի հրապարակվել, տեղեկությունները հասցրել են տարածվել:

Այսպես, Windows Phone համակարգի նոր տարբերակը համատեղելի կլինի Windows Phone 7-ի համար ստեղծված հավելվածների հետ: Բացի այդ՝ Windows 8-ի բջջային ու համակարգչային տարբերակները կունենան շատ ընդհանուր բաներ, այդ թվում՝ հավելվածները, որոնք կսինխրոնացվեն Sky Drive ամպային ծառայության միջոցով: Այսինքն՝ Microsoft-ն աշխատում է ամեն ինչ անել, որպեսզի դեսկթոփի ու հեռախոսի էկրանի պարունակությունը լինի հնարավորինս նույնը:

Ընկերությունը նաև լուծումներ կառաջարկի կորպորատիվ հաճախորդների համար: Windows Phone 8-ը կկոդավորի համակարգով ստացվող ու ուղարկվող տվյալները:
Windows 8-ի թողարկման ամսաթիվը դեռ հայտնի չէ, բայց սպասվում է, որ այն կներկայացվի այս տարվա ընթացքում: